Oculi (Mójej wócy glědatej stawnje na Kněza. Ps 25,15)

Proprium – liturgiske elementy

liturgiska barwa: wiolet

Gronko tyźenja

Chtožkuli ze swójeju ruku za chołujom pśimnjo a naslědk glěda, njegóźi se do Bóžego kralojstwa. (Lk 9,62)

Prjatkaŕske teksty

Z dolnoserbskeje Biblije wót lěta 1868

I  Jer 20,7–11a(11b–13)

II Lk 9,57–62

III Hef 5,1-2(3–7)8–9

IV 1 kral 19,1–8(9–13a)

V Lk 22,47–53

VI 1 Pětš 1,(13–17)18–21

Kjarliž tyźenja

„Jezu, źi prědk nas” (DK 282)

Psalm tyźenja

Ps 34,16–23

¹⁶Knězowej wócy markujotej na tych pšawych a jogo wušy na jich kśikanje.

¹⁷Knězowe woblico pak glěda njelubosnje na tych, kenž zlě cynje, aby wón jich spomnjeśe wurodował wót zemje.

¹⁸Gaž te pšawe kśikaju, ga Kněz słyšy a jich wumóžo ze wšykneje jich nuze.

¹⁹Kněz jo blisko pśi tych, kenž złamaneje wutšoby su, a pomoga tym, kenž zbitego ducha maju.

²⁰Ten pšawy dej wjele śerpjeś, ale Kněz jomu pomoga wót togo wšyknogo.

²¹Wón jomu wobzwarnujo wšykne jogo kósći, až wót nich razka jadna se njezezłamjo.

²²Togo njepóbóžnego njegluka wusmjerśijo; a te, ak tomu pšawemu gramuju, změju winu na se.

²³Kněz wumóžo dušu swójich słužabnikow; a wšykne, kenž swójo dowěrjenje na njogo stajiju, njezměju žedneje winy na se.

Epistola

Z dolnoserbskeje Biblije wót lěta 1868

Hef 5,1–2(3–7)8–9

Ewangelium

Lk 9,57–62

⁵⁷Ako Jezus źěšo ze swójimi wuknikami do Jeruzalema, gronjašo jaden k njomu: „Ja cu za tobu hyś, źožkuli ty pójźoš.”

⁵⁸A Jezus źašo njomu: „Liški maju jamy, a togo njebja ptaški gnězda; ale cłowjeka Syn njama nic, źo by swóju głowu scynił.”

⁵⁹A wón źašo jadnomu drugemu: „Źi za mnu.” Ten pak gronjašo: „Kněžo, pśiwdaj mě, aby nejpjerwjej šeł swójogo nana zakopat.”

⁶⁰Jezus pak źašo njomu: „Daś wumarłe swójich wumarlikow zakopuju, ty pak źi a zapowědaj Bože kralojstwo!”

⁶¹A zasej drugi gronjašo: „Kněžo, ja cu za tobu hyś, ale pśiwdaj mě nejpjerwjej, aby se rozžognował z tymi, ako we mójom domje su.”

⁶²Jezus pak źašo njomu: „Chtožkuli ze swójeju ruku za chołujom pśimnjo a naslědk glěda, njegóźi se do Bóžego kralojstwa.”

➚ teke: Dolnoserbske Perikopy, Chóśebuz 2011